ਆਏ ਜੋ ਸਾਡੀ ਜਿੰਦਗੀ ਚ ਲੱਖਾਂ ਅਜਾਬ ਲੈ ਕੇ
ਅੱਜ ਉਹ ਮਿਲੇ ਅਸਾਂ ਨੂੰ ਸੂਹਾ ਗੁਲਾਬ ਲੈ ਕੇ
ਸਿਰ ਤੇ ਹੈ ਸਾਲੂ ਅੱਖਾਂ ਵਿੱਚ ਸ਼ਰਮ ਹਯਾ ਦੇ ਡੋਰੇ
ਨਿੱਕਲੀ ਹੈ ਪੋਣ ਫਿਰ ਅੱਜ ਹੱਥ ਚ ਕਿਤਾਬ ਲੈ ਕੇ
ਖਾਮੋਸ਼ੀਆਂ ਚ ਕਿਧਰੇ ਨਾ ਘੁਲ ਜਾਏ ਇਹ ਸ਼ੋਰ
ਟੁਰਦੇ ਹਾਂ ਘਰ ਤੋਂ ਮੁੱਖ ਤੇ ਚੁੱਪ ਦਾ ਨਿਕਾਬ ਲੈ ਕੇ
ਇਸ ਸ਼ੋਰ ਚ ਕਿਹੜਾ ਹੈ ਜੋ ਇਸਦੀ ਅਵਾਜ ਜਾਣੇ
ਬੜੀ ਦੇਰ ਤੋਂ ਖੜੇ ਹਾਂ ਦਰ ਤੇ ਰਬਾਬ ਲੈ ਕੇ
ਮੈ ਹੋਸਲਾ ਫਿਰ ਕਰਕੇ ਜਾ ਪਹੁੰਚਿਆ ਓਦੇ ਦਰ ਤੇ
ਪਰ ਪਰਤਣਾ ਪਿਆ ਫਿਰ ਕੋਰਾ ਜਵਾਬ ਲੈ ਕੇ
ਜੋੜ, ਘਟਾਓ, ਗੁਣਾ, ਜਰਬਾਂ, ਤਕਸੀਮਾਂ ਸਭ
ਆਏ ਨੇ ਅੱਜ ਉਹ ਸਾਡਾ ਚਿਰ ਦਾ ਹਿਸਾਬ ਲੈ ਕੇ
ਮੁਕਾ ਕੇ ਗਿਲੇ ਸ਼ਿਕਵੇ ਆ ਮਿਲ ਤੂੰ ਅੱਜ ਅਸਾਨੂੰ
ਮਿਲਣਾ ਪਏ ਨਾ ਅੱਖਾਂ ਚ ਹੰਝ ਦਾ ਸੈਲਾਬ ਲੈ ਕੇ
ਰੋਜ਼ੀ ਸਿੰਘ